Flřtilei­ir
Hßlfdßn Bjarki Hßlfdßn Bjarki | fimmtudagurinn 4. desemberá2014

GHH - ┴varp ß afmŠli Snjˇflˇ­aseturs

Það er ekki sjálfgefið að stofnun á borð við Snjóflóðasetrið haldi starfsemi sinni gangandi utan höfuðborgarinnar. Flest vitum við að hart er oft sótt að slíkum útvörðum ríkisins og fræðasamfélagsins. Enn glæsilegra er þegar tekst að halda áfram að byggja slíkar stofnanir upp. Slíkt verður ekki gert í mótdrægu umhverfi nema áberandi árangur náist. Hér í Snjóflóðasetrinu hefur því greinilega náðst svo mikilsverður árangur að talin er ástæða til að styrkja það og efla. Eftir höfðinu dansa limirnir og við vitum að Harpa Grímsdóttir á mikinn heiður að þessum árangri.

Mikilvæg undirstaða þess að svona vel takist til er hagstætt umhverfi. Þróunarsetrið hefur reynst þetta umhverfi. Fræðastörf og gróskumikið mannlíf eru innihaldsefnin sem án efa hafa reynst Snjóflóðasetrinu og fleiri stofnunum haldreipi og sannað að hægt er að halda úti merkum og gagnlegum stofnunum á Vestfjörðum. Sérfræðistörf á landsbyggðinni stuðlar að aukinni menntun á svæðinu og aukinni söfnun þekkingar fyrir þjóðina alla, þau eru því ákaflega mikilvæg. Þróunarsetrið og allt það sem hér hefur átt sér stað hefur fyllilega sannað að sérfræðistörf á landsbyggðinni geta verið landi og þjóð til mikilla heilla og engin ástæða til að líta á þau sem ölmusur.

Hérna á Veðurstofan líka nánari snertiflöt við samfélagið, í gegnum Snjóflóðasetur, en oft er með ríkisstofnanir. Það leiðir til ákveðins samtals sem er mikilvægt fyrir þróun stofnunarinnar og fræðanna.

Snjóflóðasetrið á auðvitað vel heima hér á norðanverðum Vestfjörðum. Hvergi á Íslandi hefur harmur snjóflóða barið jafn fast að dyrum undanliðna áratugi. Snjóflóðin 1995 vöktu þjóðina til umhugsunar um mikilvægi ofanflóðarannsókna. Í framhaldinu hefur getu okkar til hættumats fleygt fram og varnaraðgerðir sett mark sitt á umhverfið.

Nálægðin við fjöllin og hætturnar er þó ekki eintómur harmur. Sem betur fer sleppum við oftast heil úr óveðrum og ýmsu sem á okkur dynur. Í oft óblíðu en stórbrotnu umhverfi njótum við útiveru og og margs konar ævintýra. Vestfirðir eru ævintýraland. Harpa hefur einmitt bent okkur á að upplifunin hér á svæðinu kalli svolítið í það fólk sem áhuga hefur á snjóflóðafræðunum. Með hjálp þekkingar sem Snjóflóðasetur heldur um og byggir upp gerum við svo okkar besta til að ævintýrin okkar endi vel en ekki illa.

Vefumsjˇn