Flřtilei­ir
fimmtudagurinn 31. maÝá2012 - 08:38 | FramkvŠmda- og rekstrarsvi­

FramkvŠmdir hafnar vi­ byggingu Eyrar

1 af 3

Fyrsta skóflustunga að nýja hjúkrunarheimilinu Eyri á Ísafirði var tekin í blíðskaparveðri í gær, miðvikudaginn 30. maí. Skóflustunguna tók Guðbjartur Hannesson velferðarráðherra en honum til aðstoðar voru á fjórða tug barna úr leikskólunum Eyrarskjóli og Sólborg sem standa sitt hvoru megin við byggingarlóð hins nýja hjúkrunarheimilis.

Byggingin hefur verið á dagskrá allt frá því að dvalarheimilið Hlíf var tekið í notkun um 1990, en þjónustudeild Hlífar var alla tíð ætluð til bráðabirgða. Segja má að aukinn þungi hafi komist í umræðuna árið 2010 þegar ákveðið var að loka þjónustudeildinni vegna mikils kostnaðar bæjarfélagsins. Haustið 2011 bar velferðarráðherra bæjaryfirvöldum í Ísafjarðarbæ þá ánægjulegu frétt að bygging hjúkrunarheimilisins yrði brátt að veruleika og kom þar til móts við þetta áratuga langa baráttumál heimamanna.

Hjúkrunarheimilið verður 30 rýma með stækkunarmöguleika um 10 rými þeim til viðbótar ef þörf krefur í framtíðinni. Húsnæðið verður um 2.300 fermetrar að stærð og kostnaður við bygginguna er áætlaður um 850 milljónir króna. Lóðaframkvæmdir hefjast um leið og fyrsta skóflustungan hefur verið tekin, en gert er ráð fyrir því að bygging hússins verði boðin út á haustmánuðum.

„Hálfnað er verk þá hafið er segir máltækið. Ég held reyndar að við séum komin lengra á veg en svo. Skóflustungan markar tímamót en strax á morgun hefjast framkvæmdir með stórvirkari vinnuvélum. Ég veit að þetta er langþráð stund hjá heimamönnum og raunar geta allir sem láta sig málefni aldraðra varða glaðst yfir þessum áfanga því þörfin fyrir hjúkrunarheimili hér sem uppfyllir allar nútímakröfur um skipulag og aðbúnað íbúa er orðin brýn“, sagði Guðbjartur Hannesson velferðarráðherra við þetta tilefni.

Eiríkur Finnur Greipsson er formaður byggingarnefndar hins nýja hjúkrunarheimilis.„Það er stórkostlegt að þetta gamla baráttumál heimamanna skuli vera komið svona langt og það sjái nú fyrir endann á þessu ferli. Ég held að það þræti enginn fyrir það hversu nauðsynlegt er að hlúa vel að öldruðum, því það eru jú þeir sem hafa byggt upp það góða velferðarsamfélag sem við búum í. Það er þess vegna mjög ánægjulegt að bygging heimilisins sé komin af stað. Allir sem að þessu hafa unnið, hvort sem það er nú síðustu misserin eða þeir sem mörkuðu slóðina á undan okkur, vona og trúa því að tilkoma heimilisins verði heillaspor fyrir samfélagið allt, en þó fyrst og fremst fyrir það fólk sem þar á eftir að búa“, sagði Eiríkur.

Vi­bur­adagatal
« Nˇvember »
S M Ů M F F L
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30    
Vefumsjˇn